木奈賓
- Oct 11, 2017

唔炒 iPhone 炒 Tesla Model 3？

香港地，乜都話要炒炒炒，樓要炒，連 iPhone 都要炒，之不過汽車市場就多數無乜炒風，那些限量幾部嘅超跑，也非人人炒得起。不過，Tesla 入門車 Model 3 或者會改變呢個情況。話說，早前已陸續在美國本土交車嘅 Tesla Model 3，預訂人數眾多，而生產線就無理想中咁順利，搞到供不應求。讀過 Econ demand and supply 嘅你，自然就會聯想到有炒風。美國那邊，就出現咗第一部易手 Tesla Model 3 放盤。

有幸成為首批 Model 3 車主，唔好好去享受駕駛樂趣，卻打算將車子放售，叫價都唔低，開價 $150,000 美金，即係大概 HK$1,167,000！嘩，呢個價，在香港直頭買到 Model X 啦！留意，Model 3 定價只係由 $35,000 美金起。呢位「獅子開大口」車主，於日前將車放上 Craigslist 平台放售，簡介就話佢部車只係用過好少里數，約 2,000 里，設有全天幕天窗、可續航 310 mile 嘅電池組，仲話明買咗呢部車可以在 40 萬人面前（預訂了 Model 3 的準車主）「打尖」。最後加多句「THIS IS REAL」，話明非誠勿擾。

暫時就未知呢位師兄能否成功放車，但睇佢叫價咁高，精明嘅你都可能轉買 Model S 或 Model X 啦，除非你真係鍾意細車仔（相對地細）。講開二手 Tesla，最近 Tesla 香港都力推官方易手車，有咩好？例如就係，毋須交首次登記稅，同埋享受永久無限 Supercharge 服務咁，聽聞呢堆易手車里數低而且都可以享受原廠保養服務，唔想挨貴稅，有得諗。